O plan é unha das novidades do Horizonte Europa e establece as liñas de inversión para os primeiros catro anos tendo en conta as prioridades da Unión Europea para este período financeiro.
Bruxelas, 12 de abril de 2021- O primeiro plan estratéxico é unha do novo programa de investigación e innovación, Horizonte Europa, dotado con 95 mil millóns de euros. Este documento de traballo establece as seguintes orientacións estratéxicas de aquí a 2024:
• Promover unha autonomía estratéxica aberta: Trátase de desenvolver novas tecnoloxías, sectores e cadeas de valor que sexan claves para futuro.
• Avanzar cara unha Europa climáticamente neutra e sostible, convertendo o continente na primeira economía circular e baseándose na tecnoloxía dixital.
• Restaurar a biodiversidade europea e mellorar a xestión dos recursos naturais: O obxectivo é recuperar os ecosistemas do continente e aproveitar os recursos de maneira sostible.
• Crear unha sociedade máis resiliente, democrática e inclusiva. Consiste en poñer ao conxunto da sociedade no centro das políticas favorecendo unha economía ao servizo das persoas.
As institucións cooperarán internacionalmente para facer fronte a algún destes retos que afectan ao panorama mundial.
Ademais destas prioridades, o plan estratéxico identifica asociacións europeas cofinanciadas e coprogramadas, así como misións da UE. Estas asociacións ou partenariados buscan conectar o sector público e privado para reducir a fragmentación no campo da investigación e contribuir a acadar os obxectivos comunitarios. Os partenariados cubrirán ámbitos cruciais como o da enerxía, a saúde ou a alimentación e complementarán as dez asociacións europeas institucionalizadas que propuxo a Comisión en febreiro.
Por outra banda, as misións identifican retos mundiais que afectan á sociedade como pode ser o cancro, a protección dos océanos ou a garantía do solo e dunha alimentación saudable. As misións serán abordadas mediante proxectos de investigación, medidas políticas ou iniciativas lexislativas.
As prioridades establecidas no plan estratéxico aplícanse a través do programa de traballo de Horizonte Europa e que ofrece oportunidades de financiamento con convocatorias temáticas. As primeiras convocatorias de propostas presentaranse nas Xornadas Europeas de Investigación e Innovación que terán lugar os días 23 e 24 de xuño.
O Plan Xeral de Traballo 2021-2022 do Horizonte Europa pódese consultar xa a través deste
enlace.
Ademais das misións que abordan temas globais, as orientacións do plan tamén tratan cuestións horizontais, como o do xénero. A integración da dimensión de xénero pasa a ser con este novo programa un requisito imprescindible en calquera contido de investigación e innovación.