Novas da UE

Bruxelas, 11 de febreiro 2022. Como consecuencia da saturación dos sistemas sanitarios durante a pandemia, a loita contra o cancro experimentou un retroceso significativo no último ano. Neste sentido, estímase que a crise sanitaria impediu o diagnostico de aproximadamente un millón de casos de cancro na Unión Europea.

 

Por tanto, un ano despois da publicación do Plan Europeo de Loita contra o Cancro e con motivo do Día Mundial contra o Cancro (o 4 de febreiro), a Comisión Europea deu outro paso para aumentar o acceso á prevención, a detección precoz, o tratamento e os coidados do cancro. Para iso, puxo en marcha unha serie de novas iniciativas, anunciadas no evento «Garantir a igualdade de acceso para todos: O cancro nas mulleres — Plan Europeo de Loita contra o Cancro», organizado pola Comisión Europea o 2 de febreiro. Este evento centrouse nas desigualdades de xénero e en adoptar medidas específicas para abordar o cancro nas mulleres. Trátase do primeiro dunha serie anual de eventos, centrados en como aumentar a igualdade de acceso para todos en relación coa prevención e os coidados do cancro.

Máis ou menos, en Europa o cancro afecta os homes lixeiramente máis que ás mulleres, cun 54 % de novos casos e un 56 % das mortes. Con todo, o cancro de mama feminino é o máis diagnosticado (máis de 355 000 mulleres na UE en 2020).

Tamén existen desigualdades considerables dentro dos Estados membros da UE e entre eles, así como entre grupos de poboación nos ámbitos da detección precoz, o diagnóstico, o tratamento e a calidade dos coidados aos pacientes. Así mesmo, chaman particularmente a atención as taxas estimadas de incidencia do cancro cervicouterino (no que as diferenzas chegan a ser de cinco veces máis) e as taxas de mortalidade (que presentaron variacións de ata oito veces máis en 2020 en toda a UE). Estas grandes variacións poden explicarse polas diferenzas na incidencia do virus do papiloma humano (VPH) e nas políticas de vacinación e cribado do cancro cervicouterino nos países da UE. O obxectivo xeral do Plan Europeo de Loita contra o Cancro é reducir as desigualdades en todas as etapas da enfermidade.

A Comisión anunciou catro novas medidas do Plan da UE contra o Cancro para apoiar aos Estados membros na loita contra as desigualdades, a mellora do cribado e a vacinación contra o VPH e o apoio ás persoas que sufriron cancro:

O Plan Europeo de Loita contra o Cancro é un piar clave da Unión Europea da Saúde anunciada pola presidenta Von der Leyen no seu discurso de setembro de 2020 sobre o Estado da Unión, no que se avoga por unha Unión Europea máis segura, resiliente e mellor preparada.

 

O Plan contra o Cancro, que se puxo en marcha en 2021, establece un novo enfoque da UE para a prevención, o tratamento e os coidados do cancro a través dun enfoque integrado de saúde en todas as políticas e coa participación dun amplo abanico de partes interesadas. Propón dez iniciativas emblemáticas e múltiples medidas para facer fronte a todas as etapas da enfermidade, desde a prevención ata a calidade de vida dos pacientes e sobreviventes de cancro, centrándose naquelas medidas nas que a UE poida achegar máis valor engadido.

O programa UEproSaúde e outros programas de financiamento destinaron un total de 4 000 millóns de euros a medidas de loita contra o cancro. En 2021, puxéronse en marcha dúas roldas de convocatorias no marco do programa UEproSaúde, que deron lugar a 16 novas iniciativas importantes. O próximo programa de traballo para 2022 adoptouse recentemente e inclúe de novo un número significativo de medidas contra o cancro, esta vez con especial énfase na prevención e o diagnóstico. 

O Plan contra o Cancro segue traballando conxuntamente coa Misión Horizonte Europa sobre o Cancro, garantindo a coherencia entre os ambiciosos obxectivos de investigación e uns obxectivos realistas das políticas neste ámbito.