Novas da UE

Bruxelas, 9 de febreiro de 2022. A Comisión vén de publicar unha proposta de Recomendación do Consello para garantir que a transición cara á neutralidade climática sexa equitativa e inclusiva. A proposta inclúe unha serie de orientacións políticas destinadas a axudar aos Estados membros a deseñar e aplicar paquetes de medidas que aborden de maneira global os aspectos sociais e de emprego relacionados coa transición. 

A proposta presta especial atención ás necesidades das persoas e os fogares que dependen en gran medida dos combustibles fósiles e que poderían verse máis afectados pola transición ecolóxica, e convida os Estados membros a facer un uso óptimo do financiamento público e privado e a traballar en estreita cooperación cos interlocutores sociais.

A equidade e a solidariedade son principios que definen o Pacto Verde Europeo. Para que a transición ecolóxica se leve a cabo con éxito, necesítanse accións políticas para apoiar ás persoas a que participen activamente no proceso. Con medidas e políticas adecuadas, a transición ecolóxica ten o potencial de crear na UE un millón de postos de traballo de aquí a 2030 e dous millóns de aquí a 2050. Ao mesmo tempo, é importante garantir que ninguén quede atrás e que a UE e os seus Estados membros sigan mellorando as súas capacidades para anticipar o cambio e prestar apoio específico a rexións, industrias, traballadores e fogares que se enfrontan a retos futuros.

Para aproveitar plenamente o potencial social e de emprego da transición ecolóxica, é esencial utilizar todas as ferramentas dispoñibles e poñer en marcha as políticas adecuadas a escala da UE, nacional, rexional e local. Esta proposta anima aos Estados membros a adoptar medidas e accións adaptadas ás súas circunstancias particulares, entre elas:

O Pacto Verde Europeo, lanzado en 2019, establece a estratexia da UE para converterse no primeiro continente climaticamente neutro e transformar a Unión nunha sociedade sostible, máis equitativa e próspera que respecte os límites do planeta. A necesidade dunha transición equitativa é parte integrante do Pacto Verde, no que se subliña que ningunha persoa nin territorio deben quedar atrás.

Isto está en consonancia co Acordo de París de 2015, a Axenda Estratéxica 2019-2024 do Consello Europeo e a Lexislación Europea sobre o Clima, en vigor desde xullo de 2021. O Plan de Acción do Pilar Europeo de Dereitos Sociais completa e apoia a transición ecolóxica e dixital en consonancia cunha Europa social forte, en particular a través de tres obxectivos principais da UE nos ámbitos do emprego, as capacidades e a inclusión social, referendados polos dirixentes da UE en maio e xuño de 2021.

En xullo de 2021, a Comisión adoptou o paquete de medidas «Obxectivo 55» para cumprir o obxectivo climático vinculante da UE para 2030 que consiste en reducir as emisións netas de gases de efecto invernadoiro en polo menos un 55 % no camiño cara á neutralidade climática de aquí a 2050. Isto incluía o Fondo Social para o Clima, cuxo obxectivo é mobilizar 72 200 millóns de euros para abordar os efectos que o comercio de dereitos de emisión no transporte por estrada e nos edificios ten nos fogares vulnerables, as  microempresas e os usuarios de transportes, que se financiará cos ingresos do novo réxime de comercio de dereitos de emisión. Como parte do paquete «Obxectivo 55», a Comisión anunciou unha proposta de Recomendación do Consello para finais de 2021 que ofreza orientacións adicionais aos Estados membros sobre a mellor maneira de abordar os aspectos sociais e laborais da transición ecolóxica.