Axenda FGE

Aluguer de sala

Transparencia

Convocatorias UE

Bruxelas, 21 de decembro de 2021. A Comisión Europea vén de presentar un plan de acción para axudar á economía social europea a prosperar, aproveitando o seu potencial económico e de creación de emprego, así como a súa contribución para unha recuperación xusta e inclusiva, e para as transicións ecolóxica e dixital.

As organizacións da economía social son entidades que priorizan os fins sociais e ambientais, reinvestindo nelas mesmas a maior parte dos seus beneficios. Estas entidades abarcan gran variedade de sectores e adoptan diversas formas, desde cooperativas ata empresas sociais. O reforzo da economía social non só crea postos de traballo, senón que tamén permite ás organizacións aumentar o seu impacto social en toda a UE. 

O Plan de Acción para a Economía Social busca facilitar o progreso e o crecemento das organizacións de economía social intervindo en tres ámbitos:

Para que a economía social prospere, é fundamental crear unha contorna adecuada con marcos xurídicos e de políticas. Isto inclúe os marcos relativos á fiscalidade, á contratación pública e ás axudas estatais, que deben adaptarse ás necesidades da economía social.

Para abordar estas cuestións, a Comisión propoñerá unha recomendación do Consello sobre o desenvolvemento das condicións marco da economía social en 2023. Tamén publicará orientacións para os Estados membros sobre os marcos fiscais para as organizacións da economía social e facilitará o acceso ás orientacións sobre axudas estatais. O plan de acción tamén ten por obxecto mellorar as boas prácticas en materia de contratación pública socialmente responsable e promover a economía social fora das fronteiras da UE.

O apoio ao desenvolvemento empresarial debe axudar a que as entidades da economía social inicien a súa actividade e se expandan, así como a promover a reciclaxe profesional e a mellora das capacidades dos seus traballadores. Para o período 21-27, o Marco Financeiro Plurianual prevé destinar en torno a 2 500 millóns de euros á economía social.

Entre outras accións, a Comisión lanzará en 2022 novos produtos financeiros no marco do programa InvestEU, mellorará o acceso ao financiamento e creará un Centro Europeo de Competencia para a Innovación Social. Ademais, a Comisión poñerá en marcha en 2023 un novo portal europeo de economía social, a fin de garantir que os axentes da economía social poidan atopar nun mesmo lugar toda a información que necesiten sobre financiamento, políticas, formación e iniciativas da UE

O plan de acción pretende dar visibilidade á economía social e mellorar o recoñecemento do seu traballo e do seu potencial. A Comisión levará a cabo actividades de comunicación que salienten as funcións e as particularidades da economía social. Así mesmo, iniciará un estudo para recoller datos cualitativos e cuantitativos que axuden a comprender mellor a economía social en toda a UE. Entre outras moitas actividades, tamén organizará cursos de formación para funcionarios sobre diversos temas pertinentes para a economía social e a fomentará a nivel rexional e local á vez que promoverá os intercambios transfronteirizos.

Ademais, co plan de acción a Comisión pon en marcha unha «vía de transición» para contribuír ás transicións ecolóxica e dixital da economía social, en diálogo coas autoridades públicas e as partes interesadas. Con este fin, a Comisión pon tamén á disposición dos cidadáns unha enquisa ata o 28 de febreiro de 2022 para que expresen a súa opinión sobre a vía de transición.

A economía social engloba gran variedade de empresas, organizacións e entidades xurídicas que centran a súa misión nas persoas e o medio ambiente, e reinvisten a maior parte dos seus beneficios na propia organización ou nunha causa social concreta. 

O plan de acción para a economía social basease na iniciativa en favor do emprendemento social de 2011, e é o resultado dun amplo proceso de consulta cos cidadáns e as partes interesadas.