Axenda FGE

Aluguer de sala

Transparencia

Convocatorias UE

Bruxelas, 15 de decembro de 2021. O debate sobre o futuro da Unión Europea debería dar lugar a unha colaboración máis profunda e sistemática cos entes locais e rexionais, segundo o Comité Europeo das Rexións (CDR), que o 1 de decembro publicou unhas recomendacións nas que pide tamén que a consulta directa coa cidadanía adquira máis importancia na vida da Unión. O CDR subliña a necesidade de que a Comisión Europea aplique unha perspectiva rexional en cada avaliación de impacto previa á publicación dunha proposta e que, en caso de non facelo, estea obrigada a facilitar unha explicación pública.

As recomendacións do CDR, contidas tanto no ditame sobre a mellora da lexislación como nunha resolución sobre o programa de traballo da Comisión Europea para 2022, profundan na petición exposta polo Comité desde hai tempo de que as rexións e cidades deben ter máis influencia nas políticas que están obrigadas a aplicar. Por exemplo, as recomendacións piden á Comisión que destaque os efectos que a lexislación pode ter nas rexións e que involucre máis estreitamente aos parlamentos rexionais na elaboración das políticas cando existan retos específicos para as rexións.

O informe insta á UE a que aproveite mellor a proximidade á cidadanía de que gozan os entes locais e rexionais. Ademais, suxire que se poña en marcha un mecanismo permanente que permita a participación cidadá nos asuntos da UE como continuación á actual Conferencia sobre o Futuro de Europa (COFE). O CDR traballa de feito estreitamente cos entes locais e rexionais para organizar paneis cidadáns a pequena escala en toda a UE. Durante o pasado pleno de decembro, representantes destes paneis uníronse ao antigo presidente do Consello Europeo, Herman Van Rompuy, nun debate sobre a COFE.

Nos últimos anos, a Comisión comprometeuse a reducir e simplificar a lexislación e a mellorar a transparencia. O CDR apoiou as iniciativas da Comisión Europea, en particular a contribución da Plataforma «Preparados para o Futuro», creada para guiar os esforzos por simplificar a lexislación europea e reducir así os custos innecesarios, e o Grupo Operativo sobre Subsidiariedade. Tamén apoiou que na elaboración de políticas se introduza o enfoque de «non prexudicar significativamente», un principio que sustenta o Pacto Verde Europeo. Con todo, o informe e a Resolución do CDR destacan que os esforzos realizados ata o de agora non alcanzan a calidade de colaboración necesaria.

O Comité reprochou á Comisión Europea que á hora de elaborar a lexislación non tivese debidamente en conta os retos aos que se enfrontan determinadas rexións. Sinalou que calquera enfoque «insensible aos territorios» causado, por exemplo, pola ausencia de datos subnacionais e a falta de análise subnacionais, podería ter «un impacto negativo e duradeiro sobre a Unión no seu conxunto, sobre o espírito de cohesión entre territorios e sobre a vida das persoas».

O propio CDR intentou mellorar a calidade da elaboración de políticas mediante a posta a proba do proxecto Rede de centros rexionais , ou RegHubs, que ten como obxectivo recoller información sobre a aplicación da lexislación comunitaria. RegHubs deu lugar ata o de agora a informes sobre as vantaxes e as deficiencias da lexislación da UE en materia de asistencia sanitaria transfronteiriza, axudas agrícolas, calidade do aire e contratación pública, e agora é un elemento integrante do programa de mellora da lexislación da UE e da Plataforma «Preparados para o Futuro». En opinión do Sr. Zanin, o mecanismo de retorno de información podería utilizarse máis amplamente e desenvolverse máis.

Entre as innovacións específicas que o CDR desexaría ver atópase a posibilidade de que as rexións poidan unirse ás negociacións entre a Comisión Europea, o Parlamento Europeo e os Estados membros sobre os expedientes que máis as afectan.

Máis información: Comité Europeo das Rexións