Axenda FGE

Aluguer de sala

Transparencia

Convocatorias UE

Bruxelas, 8 de decembro de 2021. A UE necesita unha estratexia que poida axudar á industria para reducir as emisións de gases de efecto invernadoiro e alcanzar a neutralidade climática ao mesmo tempo que axuda a recuperarse das presións da pandemia de COVID-19. Por iso, o Comité das Rexións presentou un ditame sobre a "Actualización do novo modelo de industria para Europa" no que inclúe unha serie de medidas para reforzar o papel das pemes e a dimensión territorial da estratexia industrial da UE e para impulsar políticas de innovación rexional como as Estratexias de Especialización Intelixente (RIS3) e a creación de vínculos máis estreitos entre os ecosistemas industriais e rexionais.

O ditame contribúe á Comunicación da Comisión Europea sobre a "Actualización da nova estratexia industrial 2020: Construír un mercado único máis forte para a recuperación de Europa” de maio de 2021. Nel, o Comité das Rexións pide á Comisión Europea que inclúa o nivel local e rexional no futuro deseño da nova estratexia industrial da UE. 

O papel clave que desempeñan as pequenas e medianas empresas na UE ponse de relevo no ditame, no que se pide un apoio específico ás pemes para superar a fenda dixital. Segundo o CdR, tamén é necesario investir máis en infraestruturas de proba e validación (como a Industria 4.0, as fábricas piloto e os centros de innovación dixital – os chamados digital innovation hubs), para ser capaces de levar produtos e servizos innovadores aos mercados con maior rapidez.

Así mesmo, os membros do CdR acolleron favorablemente a nova ferramenta da Comisión Europea para identificar as dependencias estratéxicas e abordalas a través da contratación pública, aínda que subliñaron que se necesita urxentemente un mecanismo para avaliar e previr a adquisición de empresas europeas, en particular de pemes non cotizadas en sectores estratéxicos.

O Comité tamén fixo fincapé na necesidade de recalibrar o marco de axudas estatais da UE para apoiar a transición das industrias de produtos básicos que fan un uso intensivo da enerxía e dependen do comercio exterior, así como para lograr unha maior compatibilidade entre os programas de financiamento da UE e os nacionais.

A asemblea dos entes locais e rexionais da UE tamén pediu a todas as empresas privadas que garantan a paridade de xénero en todos os niveis de xestión, e que a UE apoie a reciclaxe da man de obra en novas competencias a escala rexional e en todos os sectores. O Comité lembrou que a UE está lonxe de alcanzar o obxectivo de investir o 3% do PIB en I+D+i, e subliñou que algúns Estados membros da UE seguen estando por baixo do 1%.

Contexto:

As rexións son cruciais para dar forma á nova estratexia industrial da UE. A crise de COVID-19 afectou fortemente á economía da UE e ademais o seu impacto varía segundo os ecosistemas e o tamaño das empresas. 

A crise de coronavirus puxo de manifesto a  interdependencia das cadeas de valor mundiais e demostrou o papel fundamental dun mercado único globalmente integrado e que funcione ben. Neste contexto, a Comisión Europea publicou as seguintes cifras que mostran o impacto da COVID-19:

A Comisión Europea sinala 14 ecosistemas industriais: aeroespacial e defensa, agroalimentario, construción, industrias culturais e creativas, dixital, electrónica, industrias intensivas en enerxía, enerxía-renovables, saúde, mobilidade-transporte-automóbil, proximidade, economía social e seguridade civil, comercio comerciante polo miúdo, téxtil e turismo. 

Fonte: Comité Europeo das Rexións