Subscríbete!
Se queres recibir a actualidade da UE no teu correo: noticias, convocatorias, procura de socios...
Axenda FGE
Aluguer de sala
Transparencia
Convocatorias UE
01/06/2021
Nova Alianza Verde entre a UE e Xapón para acadar a neutralidade climática
- A primeira Alianza Verde da UE con Xapón pon de manifesto a vontade de reforzar a cooperación internacional para protexer o medio ambiente, conservar a biodiversidade e loitar contra o cambio climático.
- Tanto a UE como Xapón comparten o obxectivo de conseguir a neutralidade climática de aquí a 2050, polo que a Alianza Verde servirá como instrumento para unir esforzos cara á consecución dos obxectivos establecidos no Acordo de París.
Bruxelas, 1 de xuño de 2021. A Unión Europea e Xapón anunciaron o pasado mes de maio a súa intención de formar unha Alianza Verde para acelerar a transición de ambas as economías cara á neutralidade climática, a circularidade e a eficiencia dos recursos nas próximas décadas.
O acordo ultimouse durante a Cume UE-Xapón, na que ambas as partes se comprometeron a reforzar a cooperación en materia de protección ambiental, conservación da biodiversidade e loita contra o cambio climático. Segundo Frans Timmermans, vicepresidente executivo da Comisión Europea para o Pacto Verde Europeo, trátase da primeira Alianza Verde da UE, o que demostra os esforzos que se están a realizar pola creación dunha coalición mundial para acadar cero emisións a mediados de século e, así, cumprir cos obxectivos fixados no Acordo de París.
Tanto a UE como Xapón comparten a meta de conseguir a neutralidade climática en 2050, polo que a Alianza Verde fará que ambas as partes traballen xuntas para garantir o éxito da Conferencia da ONU sobre o Cambio Climático (COP26) e o consenso sobre un marco de biodiversidade mundial realista para despois de 2020, na Conferencia da ONU sobre Biodiversidade (COP15).
As cinco áreas prioritarias da Alianza son:
- Lograr unha transición enerxética rendible, segura e sostible mediante a adopción de tecnoloxías de baixa emisión de carbono, incluídas as enerxías renovables, o hidróxeno renovable, o almacenamento de enerxía e a captura, utilización e almacenamento de carbono.
- Reforzar a protección do medio ambiente mediante o fomento de prácticas máis sostibles e circulares na produción e o consumo, así como contribuíndo ao obxectivo mundial de protexer polo menos o 30% das áreas terrestres e mariñas para conservar a biodiversidade.
- Aumentar a cooperación en materia de regulamentación e o intercambio empresarial para impulsar a adopción mundial de tecnoloxías con baixas emisións de carbono e solucións ambientais que aceleren a transición mundial cara a economías neutras desde o punto de vista climático.
- Consolidar a colaboración existente en materia de investigación e desenvolvemento nos ámbitos dos proxectos de descarbonización, as enerxías renovables e a bioeconomía.
- Manter o liderado de ambas as partes en materia de finanzas sostibles a nivel internacional para axudar a converxer nunha definición de investimentos sostibles e garantir a coherencia e a transparencia sobre as divulgacións relacionadas coa sustentabilidade.
Neste contexto, ambos os socios acordaron colaborar estreitamente na escena internacional para promover a cooperación en materia de acción climática nos países en desenvolvemento. Por iso, os socios traballarán para facilitar a transición cara a sociedades climaticamente neutras e resilientes, entre outras cousas, mediante a eliminación gradual do apoio gobernamental á enerxía dos combustibles fósiles intensivos en carbono, a promoción do acceso internacional á enerxía renovable, o intercambio de información sobre os esforzos de mitigación e adaptación, e o apoio ao despregamento de tecnoloxías seguras e sostibles con baixas emisións de carbono.
Fonte: Comisión Europea
© Fundación Galicia Europa
Inicio Contacto Mapa Web Política de privacidad Política de Cookies Perfil de contratante