Novas da UE

• Seleccionaranse construcións existentes en sintonía cos valores de sostibilidade, estética e inclusión. 
• O prazo para presentar unha candidatura remata o 31 de maio. 

Bruxelas, 7 de maio de 2021- Tal e como sinala a Comisión Europea, os premios da Nova Bauhaus Europea, que forman parte da súa fase de deseño, configúranse somo un medio para “capitalizar a riqueza existente de coñecementos, experiencias e capacidades, así como para acadar novas visións, ideas e solucións” no proceso impulsado por este novo movemento. O seu obxectivo é claro: acelerar a transición verde, contribuír á recuperación e garantir unha mellor convivencia.  

Trátase da primeira convocatoria que se lanza dentro desta iniciativa, que permanecerá aberta ata o 31 de maio de 2021. 

Aqueles que o desexen, poderán presentarse a través de dúas liñas ben diferenciadas:  

A) Os Premios da Nova Bauhaus Europea (“New European Bauhaus Awards”): orientada a proxectos que estean finalizados no momento no que se presenta a obra a concurso. Poden ser conceptos, prototipos ou solucións que xa teñan sido postas en práctica na vida real. 

B) Nova Bauhaus Europea das Estrelas Ascendentes (“New European Bauhaus Rising Stars”): destinada a apoiar conceptos ou prototipos que contan cun plan de desenvolvemento e que teñen visión de futuro para ser postos en marcha no ano vindeiro. Diríxese a persoas menores de 30 no momento de presentar a candidatura. 

Existen, ademais, dez categorías nas que encaixar a candidatura: 

1. Técnicas, materiais e procesos de construción e deseño. 
2. Construcións renovadas con procesos de circularidade. 
3. Solucións que mostran a coevolución das construcións no medio ambiente e na natureza. 
4. Rexeneración de espazos urbanos e rurais. 
5. Produtos e estilo de vida.  
6. Preservación e transformación do patrimonio cultural. 
7. Lugares reinventados para atoparse e compartir espazos. 
8. Mobilización da cultura, a arte e a comunidade. 
9. Vivenda modular, adaptable e móbil. 
10. Modelos educativos interdisciplinarios. 

Outras informacións

• Os premios constitúen un punto de partida para futuras convocatorias e están dirixidos tanto a individuos como a organizacións representantes.  
• Permítense candidaturas conxuntas de máis dunha entidade.  
• Poden concorrer tanto cidadáns europeos como de fóra da UE sempre que os seus proxectos se vaian desenvolver en territorio comunitario. 

Para participar é necesario facer chegar a candidatura a través da páxina web oficial da Nova Bauhaus Europea. Ademais, a Guía para candidatos da todos os detalles para presentar un proxecto con garantías de éxito. 

Tras o peche da convocatoria a finais de maio, o proceso de selección contará co voto dos subscritores boletín informativo da Nova Bauhaus Europea así como dos socios oficiais da iniciativa. 

Contexto 

O obxectivo da Nova Bauhaus Europea, anunciada por Ursula von der Leyen, presidenta da Comisión Europea, no seu discurso sobre o estado da Unión de 2020, é contribuír á transición verde, mellorando a calidade de vida dos cidadáns. Trátase dunha iniciativa enmarcada no Pacto Verde Europeo, a nova estratexia de crecemento sostible da UE.  

A Nova Bauhaus europea levará a cabo unha ola de renovación que non só afectara ós sectores económico, tecnolóxico e medioambiental, senón que tamén incluirá o desenvolvemento cultural e social, dando una gran importancia ó proceso creativo. Neste sentido, a Nova Bauhaus desenvolverase cun enfoque interdisciplinar que promoverá a participación de todas as partes interesadas, dende expertos en innovación, enxeñeiros e técnicos ata os axentes activos dos ecosistemas industriais e inversores públicos e privados. 

Máis información