Unión EuropeaGalicia en EuropaTraballo e prácticasLicitacións na UENovas da UEPlan de Recuperación para EuropaResposta europea á COVID-19#EUROXuventude A túa voz en EuropaLigazóns de intereseResposta da UE á Covid-19

15/03/2021

Unha nova estratexia da UE para reducir a vulnerabilidade ao cambio climático

•  Esta nova estratexia propón incluír a todas as partes da sociedade e a todos os niveis de  gobernanza para fortalecer a  resiliencia climática contra os indubidables efectos do cambio climático.

•  A estratexia céntrase na recompilación e o uso de datos sobre o clima para desenvolver medidas de adaptación sistémicas que se integren na política macro-orzamentaria, que adopten solucións baseadas na natureza e que sexan de carácter local.

Bruxelas, 15 de marzo de 2021- A década pasada foi a máis cálida rexistrada, durante a cal o título do ano máis cálido superouse oito veces. Dado que o cambio climático está a ocorrer hoxe, a Comisión Europea, no marco do Pacto Verde Europeo, acaba de actualizar a Estratexia da UE sobre adaptación ao cambio climático co obxectivo de construír un mañá máis resistente. Esta nova estratexia achanda o camiño para acadar unha maior ambición en materia de resiliencia fronte ao cambio climático, pasando dunha maior conciencia e preocupación pública a unha acción colectiva en materia de adaptación. A Comisión quere involucrar a todas as partes interesadas e a todos os niveis de goberno co ánimo de mellorar a planificación a as medidas de adaptación ao cambio climático. A frecuencia e a gravidade dos extremos climáticos e meteorolóxicos, como incendios, secas ou furacáns, van en aumento ao igual que os acontecementos de aparición lenta como a desertización, a perda de biodiversidade ou a degradación das terras. 

Unha adaptación máis intelixente, rápida e sistémica

As medidas de adaptación deben basearse en datos sólidos e ferramentas de avaliación de riscos que estean á disposición de todos: desde as familias que compran, constrúen e renovan vivendas ata as empresas de rexións costeiras ou os agricultores que consideran que cultivar. Para logralo, a estratexia propón medidas que impulsan a recompilación de máis e mellores datos sobre os riscos e as perdas relacionados co clima.

A nova estratexia pretende mellorar e ampliar a Plataforma Europea de Adaptación ao Clima (Climate- ADAPT), e mesmo engadir un observatorio sanitario específico para mellorar o seguimento, a análise e a prevención dos efectos do cambio climático na saúde.

O cambio climático ten repercusións en todos os niveis da sociedade e en todos os sectores da economía, polo que as medidas de adaptación deben ser sistémicas. A Comisión Europea seguirá incorporando consideracións de resiliencia fronte ao cambio climático en todos os ámbitos políticos pertinentes. Apoiará o desenvolvemento e a aplicación de estratexias e plans de adaptación con tres prioridades transversais: integrar a adaptación na política macro-orzamentaria, solucións baseadas na natureza para a adaptación e medidas locais de adaptación.

Intensificación da acción internacional

As políticas de adaptación ao cambio climático da UE deben estar á altura do seu liderado mundial na mitigación do cambio climático. O Acordo de París estableceu un obxectivo mundial en materia de adaptación e destacou que a adaptación era un factor clave para o desenvolvemento sostible. A UE promoverá enfoques subnacionais, nacionais e rexionais de adaptación, centrándose especificamente en África e os pequenos Estados insulares en desenvolvemento.

Aumentarase o apoio á  resiliencia e preparación internacionais fronte ao cambio climático mediante a subministración de recursos, dando prioridade á acción e aumentando a eficacia, reforzando o financiamento internacional e a través de compromisos e intercambios mundiais en materia de adaptación. En paralelo, a UE tamén traballará con socios internacionais para colmar a fenda no financiamento internacional da loita contra o cambio climático.

 Fonte: Comisión Europea

Máis información

• Forxar unha Europa resiliente ao cambio climático- A nova estratexia de adaptación ao cambio climático da UE

• Preguntas e respostas: Nova Estratexia da UE sobre adaptación ao cambio climático

• Servizo audiovisual da Estratexia da UE en materia de adaptación ao cambio climático