Novas da UE

Para a execución destes fondos enmarcados na política de cohesión europea, Galicia estará por primeira vez dentro da categoría “transición” -correspondente ás rexións cun PIB de entre o 75 e o 100% da media comunitaria- descendendo así desde a categoría de rexións máis desenvolvidas, á cal ascendeu neste período desde a categoría “menos desenvolvidas”. O cofinanciamento que deberá achegar a estes fondos será do 40% (5 puntos menos que a porcentaxe inicialmente proposta pola Comisión) e deberá destinar polo menos un 45% de FEDER ao Obxectivo Político 1 “unha Europa máis intelixente que promova unha transformación económica innovadora e intelixente” e un 30% do FEDER ao Obxectivo Político 2 “unha Europa máis verde e baixa en carbono”. Os recursos restantes deberanse repartir entre os obxectivos 3. unha Europa máis conectada, 4. unha Europa máis social e 5. unha Europa máis próxima aos seus cidadáns. 

Desde hai dous anos e medio, Galicia defendeu a necesidade de que as rexións que descenden de categoría de rexión non poidan ver diminuídas as súas asignacións, segundo o sistema de repartición establecida no anexo deste regulamento. Como consecuencia deste traballo, na última fase das negociacións introduciuse unha disposición que convida os Estados membros a que teñan en conta situacións similares ás de Galicia na repartición interna das asignacións totais que recibe cada un. España recibirá 31.388 millóns de euros a prezos de 2018. 

Doutra banda, a semana pasada chegouse a un acordo político sobre os regulamentos específicos de FEDER e do novo Fondo de Transición Xusta. O primeiro contempla, por primeira vez, unha definición de áreas despoboadas como aquelas cunha densidade de poboación inferior a 12,5 habitantes por quilómetro cadrado ou aquelas que perdesen unha media de polo menos un 1% anual de poboación no período de 2007 a 2017. Deste xeito, o FEDER poderá prestar unha especial atención a estas áreas, que compoñen a meirande parte do territorio galego.

O Fondo de Transición Xusta, pola súa banda, destinará 17 500 millóns de euros a sufragar os custos sociais e económicas da transición ecolóxica. O seu obxectivo é que beneficie a territorios altamente dependentes de industrias que non teñen cabida no proceso de transición verde, como a produción de carbón ou as que emiten unha gran cantidade de gases contaminantes. España prevé poder beneficiarse de case 800 millóns de euros para a súa Estratexia de Transición Xusta 2020-2024, na que as comarcas das Pontes e Meirama decláranse como prioritarias.