Subscríbete!
Se queres recibir a actualidade da UE no teu correo: noticias, convocatorias, procura de socios...
Axenda FGE
Aluguer de sala
Transparencia
Convocatorias UE
04/12/2020
Plan de Acción en materia de Xénero III: Unha prioridade da Acción Exterior da UE
- A Comisión Europea e o alto representante presentaron o novo Plan de Acción para a Igualdade de Xénero no exterior para o período 2021-2025 como parte da Estratexia da UE para a Igualdade de Xénero.
- O novo plan de acción promove a integración da perspectiva de xénero en todos os ámbitos da acción exterior da UE e contribúe ao apoderamento das mulleres para que fagan pleno uso dos seus dereitos e aumenten a súa participación na vida política, económica, social e cultural en todo o mundo.
Bruxelas, 2 de decembro 2020. A Comisión Europea e o alto representante da Unión para Asuntos Exteriores e Política de Seguridade presentaron o novo Plan de Acción para a Igualdade de Xénero e o Apoderamento das Mulleres na Acción Exterior 2021-2025 (GAP III) da UE para fomentar a igualdade de xénero e o apoderamento das mulleres en toda a acción exterior da Unión Europea.
Aínda que se rexistraron algúns avances importantes no fomento dos dereitos das mulleres e as nenas nos últimos anos, ningún país do mundo está en vías de alcanzar a igualdade de xénero e ampoderar a todas as mulleres e nenas de aquí a 2030. Ademais, as consecuencias sanitarias e socioeconómicas da crise da COVID-19 afectan de maneira desproporcionada ás mulleres e as nenas. Por exemplo, debido á porcentaxe máis alta de mulleres que traballan na economía mergullada e en sectores vulnerables, a súa taxa de perda de emprego é 1,8 veces maior que a dos homes.
Fomentar a igualdade de xénero na acción exterior da UE 2021-2025
O Plan de Acción en materia de Xénero III proporciona á UE un marco político con cinco piares de actuación para acelerar os avances cara ao cumprimento dos compromisos internacionais e un mundo no que todos teñan marxe para prosperar. Fai da promoción da igualdade de xénero unha prioridade de todas as políticas e accións exteriores; ofrece unha folla de roteiro para colaborar coas partes interesadas a nivel nacional, rexional e multilateral; intensifica a actuación en ámbitos temáticos estratéxicos; reclama que as institucións dean exemplo, e garante a transparencia do sistema. Os cinco piares de actuación son os seguintes:
- O 85 % de todas as novas actuacións en todas as relacións exteriores contribuirá á igualdade de xénero e ao apoderamento das mulleres de aquí a 2025: GAP III introduce normas estritas sobre a aplicación e o seguimento da integración da perspectiva de xénero en todos os ámbitos da axuda exterior.
- Visión estratéxica común e estreita cooperación cos Estados membros e os socios a nivel multilateral, rexional e nacional: GAP III avoga polo desenvolvemento dun enfoque común para todos os axentes da UE a escala de países. Dese xeito, unha coidadosa análise de xénero e unha estreita consulta cos Estados membros, as organizacións da sociedade civil, os defensores dos dereitos da muller e os mozos achegarán unha sólida base para as actuacións sobre o terreo.
- GAP III reclama que se acelere o progreso, centrándose nos ámbitos temáticos clave de intervención: como a loita contra a violencia de xénero e a promoción do apoderamento económico, social e político das mulleres e as nenas. Fai fincapé no acceso universal á atención sanitaria, a saúde e os dereitos sexuais e reprodutivos e na igualdade de xénero na educación, así como no fomento da igualdade en materia de participación e liderado. Tamén integra plenamente o marco político da UE en materia de mulleres, paz e seguridade, e achega a perspectiva de xénero a novos ámbitos políticos, como a transición ecolóxica e a transformación dixital.
- Predicar co exemplo: o plan de acción reclama que a Unión Europea dea exemplo, en particular mediante o establecemento dun liderado con perspectiva de xénero e equilibrado desde este punto de vista ao máis alto nivel político e de xestión.
- Medición dos resultados: a UE creará un sistema de seguimento cuantitativo, cualitativo e inclusivo para aumentar a rendición pública de contas, garantir a transparencia e o acceso á información sobre a súa axuda á igualdade de xénero en todo o mundo. A Comisión, en cooperación co SEAE, supervisará cada ano os avances na aplicación de GAP III.
Unha formulación transformadora
GAP III fomentará unha formulación transformadora e intersectorial, e integrará a perspectiva de xénero en todas as políticas e actuacións. O seu obxectivo é abordar as causas estruturais da desigualdade de xénero e a discriminación por este motivo, tamén mediante a participación activa de homes e nenos na loita contra as normas e os estereotipos de xénero. Por último, para non deixar a ninguén atrás, o plan de acción persegue abordar todas as dimensións transversais da discriminación, prestando especial atención, por exemplo, ás mulleres con discapacidade, as mulleres emigrantes e a discriminación por motivos de idade ou orientación sexual.
Contexto
Este plan de acción exterior en materia de xénero reflicte os obxectivos da Estratexia da UE para a Igualdade de Xénero, a primeira estratexia da Comisión no ámbito da igualdade, que cumpre os compromisos asumidos pola presidenta von der Leyen nas súas orientacións políticas.
O Plan de Acción para a Igualdade de Xénero III ten por obxecto acelerar os avances no apoderamento das mulleres e as nenas, e salvagardar os logros conseguidos en materia de igualdade de xénero durante os 25 anos transcorridos desde a adopción da Declaración de Pequín e a súa Plataforma de Acción.
O pasado mes de outubro, o Instituto Europeo para a Igualdade de Xénero (EIGE) publicou o Índice de Igualdade de Xénero 2020. Esta ferramenta mide o progreso realizado durante o último ano cara á igualdade de xénero na UE e en cada Estado membro. En 2020, a UE obtivo 67,9 puntos sobre 100, o que mostra que o progreso para chegar á paridade entre homes e mulleres é lento, mesmo na UE, e que se necesitarían 60 anos para alcanzar a plena igualdade de xénero ao ritmo actual.
En consecuencia, o Consello adoptou unhas Conclusións tituladas Abordar a brecha salarial entre homes e mulleres: valoración e distribución do traballo remunerado e do traballo non remunerado baseadas no informe do EIGE. Nestas Conclusións o Consello pide á Comisión e aos Estados membros que redobren os seus esforzos para reducir a brecha salarial entre homes e mulleres e as diferenzas debidas ao xénero no ámbito asistencial e que loiten contra os estereotipos de xénero.
Fonte: Comisión Europea
© Fundación Galicia Europa
Inicio Contacto Mapa Web Política de privacidad Política de Cookies Perfil de contratante