Axenda FGE

Aluguer de sala

Transparencia

Convocatorias UE

Bruxelas, 28 de outubro de 2020. A plataforma europea de fábricas conectadas para a fabricación áxil EFPF é un proxecto H2020 coordinado polo Instituto Tecnológico Metalmecánico, Mueble, Madera, Embalaje y Afines, AIDIMME. O seu principal obxectivo é o establecemento dun ecosistema federado de fábricas intelixentes e a creación dunha plataforma dixital que  poña en contacto aos actores relevantes na fabricación dixital. 

O proxecto vén de abrir unha convocatoria de 2,5 millóns de euros para financiar pequenos proxectos (de entre 50.000 e 150.000) que cubran algunha destas actividades:

• desenvolvan novas aplicacións

• testen/validen aplicacións e/ou servizos da plataforma EFPF

• estendan a federación con novas plataformas e servizos

O consorcio EFPF convida a participar nesta convocatoria aberta a empresas industriais, provedores de solucións dixitais, desenvolvedores de software e investigadores, que poderán financiar experimentos relacionados co desenvolvemento, integración e validación de solucións innovadoras utilizando a plataforma EFPF. Poden participar:

• Peme (incluídas as micro empresas)

• Provedores de tecnoloxía e/ou desenvolvedor software (incluíndo start- ups)

• Empresas industriais e loxísticas (de calquera tamaño)

• Emprendedores

• Institutos de investigación e universidades

A data límite para rexistrarse é o 19 de febreiro de 2021. Pode rexistrar o seu interese nesta páxina web, e solicitar a axuda a través da plataforma de F6S. 

Toda a documentación da convocatoria e o acceso aos servizos de apoio atópanse dispoñibles aquí.